वृद्ध भत्ता खाने उमेरमा दैनिक ३० क्विन्टल टमाटर उत्पादन गर्दै बाँकेका किसान

नागरिक समाज डेस्क :

कृषिमा काम गर्न चाहनेहरुका लागि बाँकेको खजुरा गाउँपालिका वडा नम्बर २ सिगाउँका ७२ वर्षिय गेनालाल मुराउ प्रेरणाका श्रोत हुनुहुन्छ ।

कृषि क्षेत्रमा काम गर्नलाई उमेरले छेक्दैन भन्ने कुराको उहाँ उदाहरण हो ।

गेनालालले आफ्नो जीवन कृषिकर्ममै विताउनुभएको छ । कृषिको काम गरेरै उहाँले धेरै राम्रो प्रगति पनि गर्नुभएको छ ।

आफ्नो घरपरिवारको आवश्यकता पूरा गरेर पनि लाखौंको सम्पत्ति पनि जोडिसक्नुभएको छ ।

मुराउकै विषयमा केन्द्रित कृषि पत्रकार खगेन्द्र दाहालले एक सामग्री तयार पार्नुभएको छ ।

वृद्ध भत्ता बुझ्दै आराम गर्ने उमेरमा पनि १५ विगाहमा व्यवसायिक टमाटर खेती गर्ने गेनालाल मुराउ विहानै देखि खेतबारीमै भेटिनुहुन्छ । यो सिजनमा उहाँलाई टमाटर लगाउन भ्याई नभ्याई छ ।

यहि साउन १ गते देखिनै टमाटर लगाउन सुरु गरीसक्नुभएका गेनालालले व्यवस्थित ढंगले आफ्नो खेतिमा काम गर्दै हुनुहुन्छ ।

अढाई विगाह भन्दा बढिमा अहिले टमाटर लगाइसक्नुभएका उहाँले विगत ४ वर्षयता जस्तै यसपटक पनि १५ विगाह क्षेत्रफलमा खेती गर्दै हुनुहुन्छ ।

पाँच वटा टनेलमा मात्र उहाँले बेर्ना जम्मा गर्नुभएको छ । केहि बेर्ना साना छन त केहि बेर्ना रोप्नका लागी तयारी अवस्थामा ।

रोपेको पनि केहि हुर्किसकेका छन ।

अहिले अलि छिप्पेको बेर्नालाई उखेल्दै रोप्ने काम भैरहेको छ ।

गेनालालले अझै एक महिना सम्म टमाटर बारीमा लगाउनुहुन्छ । २०३५ साल देखि टमाटर खेती गर्दे आउनुभएको मुराउले यसैलाई निरन्तरता दिइरहनुभएको छ ।

उहाँसहित सम्पुर्ण परिवारले खेती नै गर्ने गरेका छन । आफुले शारीरक परिश्रम गर्न नसकेपनि अरुलाई अहएर खेती गर्न सकिने मुराउ बताउनुहुन्छ ।

कतिपय किसानहरुले टमाटरमा फाइदा नभएको बताउने सुन्ने गरेका मुराउले यसमा प्रशस्त फाइदा रहेको बताउनुहुन्छ ।

टमाटर खेतीको उत्पादन विक्रि गरेरै जग्गा किने, पक्की घर निर्माण गरे, पाँच तले शिवको मन्दिर बनाए, छोराछोरीहरुलाई निजि विद्यालयमा पढाएँ भन्नुहुन्छ, मुराउ ।

कृषक गेनालालले दिनहुँ १५ जना बढि स्थानियलाई घरमै रोजगारी दिनुभएको छ ।

आधुनिक प्रविधि अपनायर टमाटर खेती गर्दा सहज र फाइदा बढि हुने उहाँको अनुभव छ ।

२०३५ सालदेखि टमाटर खेतीमा लाग्नुभएका मुराउको परिवारले हाल सम्म घाटा बेहोर्न परेको छैन ।

मुराउले सिजनमा दिनहुँ ३० क्इिन्टल सम्म विक्रि गर्ने गरेको अनुभव सुनाउनुभयो ।

उहाँले नयाँ किसानहरुलाई व्यवस्थित तरिकाले खेती गर्न अनुरोध गर्दै विदेशभन्दा राम्रो कमाई गर्न यहिँ सकिने सन्देश दिने गर्नुभएको छ ।