कौशी खेती गरे फाइदै–फाइदा, यसरी गर्नुहोस्

काठमाडौं-

शहरी क्षेत्रमा फोहोर अत्याधिक मात्रामा उत्सर्जन हुने गर्छ । दैनिक रुपमा फोहोर संकलन गर्ने गाडी नआउँदा धेरैले घरको फोहोरलाई सडकमा लगेर फ्ँयाक्ने गरको पाइन्छ ।

कतिपयले घरमै बाध्यताले बोरामा खाँदेर पनि राख्छन् । यस्तो बेलामा ती फोहोरलाई सदुपयोग गरी घरमा तरकारी खेती लगाउन सकेमा राम्रो ताजा र सफा तराकारी खाना पाइन्छ ।

शहरमा तरकारी खेती गर्नका लागि जग्गा जमिन नै आवश्यक पर्छ भन्ने हुँदैन । इच्छा र जाँगर भएमा घरका कौशीमा पनि तरकारी फलाउन सकिन्छ । जसलाई कौशी खेती पनि भनिन्छ ।

कसरी गर्ने कौशी खेती

पछिल्ला केही समययता शहरका घरका कौशीमा पनि हरियाली देखिन थालेका छन् । उनीहरु फूल तथा तरकारी रोपेर ताजा तरकारी सेवन गरिरहेका पनि छन् ।

सामान्यतया कौशीमा तरकारी खेती लगाउँदा यस्ता कुराहरुमा ध्यान दिनुपर्छ :

बाल्टीन, बोरा, थोक्रा जर्किन तयार पार्ने । मलिलो कालो माटो ल्याउने र त्यसलाई भाँडामा राख्ने ।

घरमा विशेषगरी भान्साबाट निस्कने फोहोरलाई (लसुन, अदुवा, आलुका बोक्रा, सागपात) संकलन गरेर छुटटै बाल्टिनमा राख्ने ।

त्यही फोहोरलाई कुहाएर कम्पोष्ट मल तयार पार्ने ।

कौशीमा के–के तरकारी लगाउन सकिन्छ ?

घरको कौशीमा तरकारी लगाउँदा विशेषगरी फर्सी, लौका, खुर्सानी, सिमी, घिरौला आदि लगाउन सकिन्छ । कतिपयले ठाउँ उपलब्ध भएसम्म कौशीमै पनि गोलभेँडा, काउली, बन्दा लगायतका तरकारी उब्जाउने गरेका छन् ।

यस्ता छन् कौशी खेतीका फाइदाहरु :

परिवारको इच्छाअनुसार स्वच्छ एवंम ताजा तरकारी तथा फलफूल आपूर्ति हुन्छ । दैनिक रुपमा तरकारी तथा फलफूल किन्नको लागि पैसा तथा समयको बचत हुन्छ ।

दैनिक भन्सामा निस्कने कुहिने फोहोरमैलाबाट मल निर्माण गरी वातावरण प्रदुषण नियन्त्रण तथा कौशी तरकारी खेतीबाट शहरी क्षेत्रमा हरियाली प्रर्बद्धन हुन्छ ।
शारीरिक तथा मानसिक रुपमा फूर्तिलो बनाउने छ ।